پېښور او کوټه کې ځينې خلک د ګرانۍ له کبله سره زر پلوري

په کوټه او پېښور کې زرګران وايي چې په پاکستان کې د زیاتېدونکې ګرانۍ له کبله يو شمېر کسان د ماشومانو د تعليم، علاج او نورو ورځنيو اړتياوو پوره کولو لپاره اړ شوي چې د خپل کور د ښځو سره زر خرڅ کړي. د دوی په وينا، په تېرو شاوخوا درې مياشتو کې د پېرودونکو په پرتله د پلورونکو شمېر زيات شوی دی. د پاکستان د شمارياتو اداره وايي چې په دې هېواد کې په سېپټېمبر مياشت کې د ګرانۍ کچ نهه فيصده ته رسېدلی و چې دا د اګست تر مياشتې زیات و.