پامیر ساحل
پراګ - د دې غږیز رپورټ په پیل کې تاسې د هغې خپرونې یوه برخه واورېده چې په کې د پروګرام چلوونکې د سینګار پر یوه مرکز چاپه وهلې ده او هلته پر کار کوونکو یې د نا اخلاقي کارونو تور پورې کړی دی.
د خپرونې له چلوونکې سره پولیس هم دي او په دې مرکز کې له یوې چینايي ښځې پوښتنې کوي.
په دې اړه د پاکستان یوې شنونکې هما یوسف په نیویارک ټایمز ورځپاڼه کې یوه لیکنه خپره کړې ده چې په کې یې د دې خپرونې او د پروګرام کوربنې پر کار انتقاد کړی دی.
'دا خبریالان نه دي'
په پېښور کې خبریال او د ټولنیزو چارو شنونکی افتخار فردوس وايي، پر پاکستانیو ټیلي ویژنونو د اخلاقیاتو تبلیغ کوونکي اصلاً خبریالان نه دي بلکې دا د تفریحي خپرونو او پروګرامونو چلوونکي دي چې اوس په خبري رسنیو کې کار کوي.
افتخار فردوس له مشال راډیو سره د خبرو پر وخت وویل، دا د رسنیو یا خبریالانو کار نه دی چې د ټولنې اخلاق سم کړي.
نو که دا د خبریالانو کار نه دی نو بیا خبریالان ولې داسې کارونه کوي؟ د بېلګې په توګه یو څو میاشتې مخکې هم د پاکستان پر یوه ټیلي ویژن چینل داسې خپرونه خپره شوه چې په کې د پروګرام چلوونکې پر یوه پارک چاپه ووهله او هلته یې پر ورغلو کسانو تورونه پوه کړل. نو ایا دا د رسنیو د ازادۍ نتیجه ده او که څنګه؟
پوره رپورټ دلته واورئ
احساساتي خپرونې ډېر لیدونکي لري
شنونکی افتخار فردوس وايي، دی له دې خبرې سره موافق نه دی چې ګواکې په پاکستان کې رسنۍ ازادې دي.
د چارو تجریه کاره هما یوسف په خپله مقاله کې لیکي چې په پاکستان کې شخصي خبري ټیلي ویژن چینلونه د اشتهاراتو په پیسو چلېږي او په دې ذریعه پیسې ګټي هم نو ځکه د زیاتو لیدونکو پیدا کولو له پاره خپلې خپرونې هیجاني او احساساتي جوړوي.
افتخار فردوس وايي، په پاکستان کې له ډېرې مودې راهیسې د تاو تریخوالي لړۍ روانه ده او همدا وجه ده چې احساساتي خپرونې ډېر لیدونکي لري.
دی زیاتوي، خو دا د اخلاقیاتو او داسې نورو موضوعاتو احساساتي تبلیغ له اصلي او مهمو موضوعاتو د خلکو فکر اړوي.
