د پاکستان په کراچۍ ښار کې د هدفي وژنو او تشدد په پېښو کې تېره شپه د یو پولیس سرتیري په ګډون اته کسان وژل شوي دي.
د عوامي نیشنل ګوند چارواکي وایي په وژل شویو کسانو کې د دوي د ګوند دوه غړي هم په نښه شوي دي .
د عوامي نیشنل ګوند د سند صوبې جنرل سیکرټري بشیرجان تېره شپه ناوخته مشال راډیو ته وویل چې وژل شوي دواړه کسان د دوي د ګوند غړي و.
بشیر جان زیاته کړه چې له کله راهسې په کراچۍ کې د بلدیاتي ټاکنو خبرې پیل شوې دي ، نو ترهګرو د دوي د ګوند پر غړو او مشرانو بریدونه زیات کړي دي.
د عوامي نشنل ګوند مرکزي مشر اسفندیار ولي خان په یوه خبرپاڼه کې د دې پېښې په کلکه غندنه کړېده او د قانون پر پلي کوونکو ادارو یې ږغ کړی دی چې د دوی د ګوند غړي دي له ترهګرو وساتي.
