د خېبر پښتونخوا حکومت په صوبه کې د ترهګرۍ مخنیوي او تلپاتې امن راوستلو په موخه یو بېل د ترهګرۍ ضد ځواک جوړولو او د یو شمېر نورو امنیتي پلانونو منظوري ورکړې چې، د صوبې د کورنیو چاورو سیکرېټري سید اختر علي شاه یې سپارښتنه کړې وه.
په نوي منظور کړل شوي پلان کې د زندانونو امنیت سمبالولو لپاره بېل ځواک جوړول، د بارودو معلومول او د تره ګرانو د لټون لپاره د جلا جلا روزنیزه مرکزونو منظوري ورکړل شوې ده.
د دفاعی چارو کارپوه او د پاکستاني پوځ پخوانی بریګېډیېر سید نذیر مشال ریډیو ته وویل، په کار ده په دې ځانګړي ځواک کې تعلیمیافته ځوانان وګمارل شي، چې په اسانه ورته د جدیدو وسلو کارولو تربیت ورکړل شي
چې نوی ځواک جوړل غواړي، نو په کار ده چې هغوی ته به جدیده وسله هم ورکول کېږي او د رابطی کولو لپاره به یو ښه استخباراتي نظام هم جوړېږي او پر وخت خپل ځای ته د رسېدو لپاره به یو ذریعه هم ورکوي خوا که هغه هېليکاپټر وي هم، او د دې لپاره تر کال یو نیم کال پورې پیاوړې روزنې ته اړتیا ده. او دا کار یوازې ښه تعلیمیافته ځوانان کولای شي.
د کورنیو چارو محکمې د خبرپاڼې له مخه د خېبر پښتونخوا حکومت په پېښور، مردان صوابۍ او لکي مروت کې د نویو پولیس تاڼو او پولیس لائنز منظوري هم ورکړې ده او د ملګرو ملتونو په مرسته په ملاکنډ ډویژن کی د امن امان د پر ځای کولو او د قانون د بالادستۍ لپاره د منصوبې منظوري هم ورکړې ده.
