د امریکايي ځواکونو چارواکي وايي، په افغانستان کې له جګړې پاتې هېڅ ډول اضافي پوځي سامانونه به پاکستان ته ورنکړي.
د ناټو په مشرۍ د نړیوالو سوله ساتي ځواکونه یا ایساف پرون په یوه بیان کې ویلي، امریکايي پوځ داسې هېڅ پلان نه لري. په بیان کې نه دي ویل شوي چې د امریکا پوځ به له خپل اضافي پوځي سامان سره څه وکړي.
بیان د نړیوالو ځواکونو عمومي قوماندان جنرال جوزف ډنفرډ له خولې وايي، له افغانستان او افغان امنیتي ځواکونو سره د امریکا په ژمنو کې بدلون نه دی راغلی. ډنفرډ افغان ځواکونه ستایلي دي چې په نهو میاشتو کې یې ثابته کړه چې د ولسمشرۍ او ولایتي شوراګانو انتخاباتو امنیت ټینګولو ته پوره چمتووالی لري.
