د امریکا، روسیې، اوکراین او اروپايي ټولنې لوړپوړي چارواکي نن (پنجشنبه) د اوکراین بحران په اړه خبرې کوي.
په جینیوا کې دا غونډه پر داسې وخت کېږي چې د اوکراین په ختیځ کې روسي پلوه بیلتونپالي مضبوطېږي.د تېرې چارشنبې پر ورځ د کراماتورسک په ښار کې یاغیانو د اوکراینیانو شپږ پوځي ګاډي سره د هغو چلوونکو او کارکوونکو ونیول. یاغیان په دونیڅک کې هم د ښار انتظامي دفتر ته ننوتل.
جینیوا ته په راتګ د اوکراین د بهرنیو چارو لنډمهالي وزیر اندرې دېشېڅیا وویل، دی به له مسکو غوښتنه کوي چې د ده په هېواد کې د ((ترهګرو فعالیتونو)) ملاتړ ختم کړي او له پولې خپل پوځیان په شا کړي.
په جینیوا کې نننۍ غونډې ته د روسیې او امریکا د بهرنیو چارو وزیران هم ورغلي دي.
