په کورمه کې د بېځایه شویو کډوالو خپلو سیمو د ستنېدو لړۍ د اپریل له شلمې نېټې پیلېږي. د قدرتي افتونو سمبالولو ادارې له مخې دغه سلسله به د مې میاشتې تر اوومې نېټې دوام ولري چې د مسوزو، علې شېرزو، زهمشت، او پاړه څمکنۍ شاوخوا یو سل پنځوست کلیو ته به تر ۱۲ زرو زیاتې کورنۍستنول کېږي.
د ادارې یو مشر مجاهد علي مشال راډیو ته وویل، د متاثرینو ستنولو لپاره یې ټولې تیاریانې بشپړې کړې دي.
په سیمه کې د زهمشت ۲۲ او د پاړه څمکنۍ نهه کلي داسې دي چې د چارواکي په خبره، هلته د بېځایه شویو کډوالو ستنېدنه ځنډول شوې ده ځکه چې پوځي عملیات په کې روان ول.
مجاهد علي وایي، د کډوالو ستنېدنه به د راجسټریشن کارتونو پر بنسټ کېږي. خو کډوال وايي، په ستنېدو کې ورته یو لړ خنډونه پراته دي.
په دراني کمېپ کې مېشت د کډۍ سیمې محمد میر مشال راډیو ته وویل، دا د خوشالۍ خبره ده چې ستنول کېږي خو بیا دې ته اندېښمن دی چې کارت یې بلاک دی، نو کېدای شی د ستنېدو اجازه به ورنکړل شي.
د دار سیمې یو بل کډوال غازي رحمان وايي، د خپلو بلاک شویو کارتونو د بیا فعالولو لپاره یې ډېرې هلې ځلې کړې خو چا ورته دغه کارتونه فعاله کړي نه دي او د کارتونو علاوه له دوی سره نه مرستې کېږي او نه هم ورته د ستنېدو اجازه ورکول کېږي.
په دې اړه مجاهد علي وایي، دوی کوښښ کوي چې د چا هم کارتونه بلاک دی، د هغوی ستنیدنه ممکنه کړي او مرسته هم ورسره وکړي.
له اورکزو سره پر پوله په منځنۍ کورمه کې د وسله وال طالبانو پر ضد پوځې عملیات له ۲۰۰۹ م کال راهیسې روان دي.
