اسلام اباد - په اسلام اباد کې د قبایلي سیمو د ښوونکو یا استادانو احتجاج د زیارت پر ورځ هم دوام لري.
دې ښوونکو پر چارشنبې یا شورو د دې لپاره د اسلام اباد خبریالانو مرکز مخې ته احتجاجي ناسته پیل کړه چې د دوی په وینا، له کلونو راهیسې یې د ترقۍ عمل بند دی.
د ټولو قبایلي سیمو ښوونکو سازمان دا غړي ادعا کوي چې په تېرو پنځو کالو کې د قبایلي سیمو ۴۸۰۰۰ ښوونکو ترقۍ نه دي شوې.
د یاد سازمان مشر خان مالک مسود مشال راډیو ته وویل چې حکومت له دوی سره کړې ژمنې نه دې پوره کړې.
د حکومت او دې ښوونکو ترمنځ منځګړیتوب کوونکی سېنېټر اورنګزیب خان وايي، بیا به هم حکومت ته ورځي چې دې ښوونکو ته خپل حق ورکړي.
د پاکستان وفاقي حکومت لا په دې اړه څه نه دي ویلي.
