علي بابا خان ځوان پښتون هنرمند دی چې له تېر څه مهال نه یې فعالیت پیل کړی او وايي چې د پښتو موسیقۍ په میدان کې نوې تجربې کول غواړي.
نوموړي په مشال راډیويی مجله کې د څرګندونو پر مهال وویل چې د صوفي موسیقۍ مینه وال دی. علي باباخان وايي د غني خان تصور سندره یې چې ویله نو ګمان یې نه کاوه چې خلک به یې دومره په ولولو بدرګه کړي، خو خلکو ورته دومره مینه ورکړه چې دی یې په ځان پورې حیرانه کړ.
علي بابا خان وايي په پښتو موسیقۍ کې یې هارون باچا او په اردو هغې کې یې علي عظمت د خوښې هنرمندان دي او تل یې هڅه کړېده چې د خپلو ایډیالو سندرغاړو پر پلونو پل کېږدي.
دغه ځوان پښتون هنرمند وايي لوی ارمان یې دی چې د پښتو د نامتو شاعرانو معیاري کلامونه اولس ته وړاندې کړي.
