پېښور - د خیبر پښتونخوا سوداګران او صنعتکاران وايي، حکومت د کارخانو په جوړولو کې له بهرنیو پانګوالو سره ځانګړې مرستې کوي خو خپل پانګوونکي یې له پامه غورځولي.
دا څرګندونې دې سوداګرانو د یکشنبې یا اتوار پر ورځ تر غونډې وروسته له مشال راډیو سره په خبرو کې وکړې.
د چین – پاکستان اقتصادي لار پر لنډمهاله پروژو کار روان دی چې پکې د سړکونو جوړولو، بجلۍ او ګوادر بندر ځېنې پروژې هم شاملې دي.
چارواکي وايي، د صنعتي وړو ښارونو لپاره پلان جوړونه او نور اسناد تقریباً پوره شوي دي او ژر به پر کار پیل شي.
د نوښار د رشکۍ صنعتي وړوکی ښار هم د دې پروژو برخه ده چې پکې د ودانۍ چارې په پیلېدو دي.
د خیبر پښتونخوا سوداګران او صنعتکاران وايي، حکومت د کارخانو په جوړولو کې له بهرنیو پانګوالو سره ځانګړې مرستې کوي خو خپل پانګوونکي یې له پامه غورځولي.
د پښتونخوا د سوداګرۍ او صنعتي خونې مشر حاجي محمد افضل وویل، ((موږ پر بهرنیو پانګوونکو اعتراض نه لرو خو وایو چې هغوی ته څه اسانتیاوې ورکوي، هغه دې موږ ته هم راکړي.))
د پاکستان د پلانونو وزارت له لوري د اقتصادي لار پروژو د معلوماتو څانګې مشر شوکت خټک وايي، د صنعتي پروژو لپاره یې له ځايي سوداګرانو او پانګوونکو سره مشورې کړې دي او د هغوی نیوکو ته یې پام دی:
((که د چین یا بل هېواد یو پانګوونکي له یوه [پاکستاني] هغه سره ګډه کارخانه جوړوي نو موږ به ورته ځانګړې استانتیاوې ورکوو. د دې هدف ځايي صنعت ته ګټه رسول دي.))
خو د خیبر پښتونخوا د سوداګرۍ خونو پخوانی مشر زاهد الله شینواری وايي، تر هغو چې د خپل هېواد صنتعکار ته پام نه وي شوی، بهرنۍ پانګه هېواد ته جلبول ګران کار دی:
((زموږ په هېواد کې ډېره پیسه د جایدادونو او د ځېنو نورو د ګټې په ځایونو کې بنده ده. لومړی دا پیسه هم په پانګونه کې کارول په کار دي.))
مرکزي او صوبايي حکومتونو په ګډه د وړو صنعتکارانو لپاره هم یوه پروژه پیل کړې چې هدف یې د چین – پاکستان اقتصادي لار له بشپړه فعالېدو مخکې د وړو کورنیو صنعتونو تولیدات له نړیوال معیار سره برابرول دي.
