پراګ ـ د عوامي نېشنل ګوند مرکزي جنرل سېکېرټري ميا افتخار حسين وايي چې د پاکستان ترهګرۍ مخنيوي ادارې (نېکټا) ورته د خبرداري ليک لېږلی چې پکې ويل شوي، تحريک طالبان پاکستان د هغه د وژلو پلان جوړ کړی دی.
نوموړي د اګست پر ۱۲مه مشال راډیو ته وویل چې خط يې یوه ورځ وړاندې ترلاسه کړی او تردې يوه اوونۍ وړاندې هم دغې ادارې ورته د خبرداري يو بل خط لېږلی وو.
عبدالحي کاکړ له نوموړي سره مرکه کړې او په سر کې يې هغه ته د حکومتي ادارې نېکټا له خوا د ورلېږل شوي خط تفصيل پوښتلی.
عوامې نېشنل ګوند له ۲۰۰۸مه تر ۲۰۱۳ م کال پورې په خېبر پښتونخوا کې حکومت کړی وو چې ميا افتخار حسين يې د اطلاعاتو وزير وو.
نوموړي به د ترهګرۍ د هرې پېښې ځای ته سمدستي ځان رسولو او د وسله والو او ترهګرۍ پرضد به يې له رسنيو سره خبرې کولې.
د هغه ځوان زوی ميا راشدحسين د ۲۰۱۰ کال جولای په میاشت کې په پبو کې وژل شوی وو چې بيا يې ذمه واري تحريک طالبان پاکستان و منله.
ميا افتخار حسين د تازه دړکو په اړه له مشال راډیو سره مرکه کړې چې لاندې يې اورېدئ شئ.
