د ملګرو ملتونو په ۷۳مه عمومي اسمبلۍ کې هند او پاکستان یو بل تورن کړل چې په سیمه کې ترهګري پالي کار ترې اخلي.
په دې روانه اسمبلۍ کې د هند یوې لوړپوړې استازې اینم ګمبیر وویل، پاکستان باید د نورو د ملامتولو پرځای د "نوي پاکستان" لیدلوری وښيي چې د "دوکې او ورانولو" دریځ یې اړولی دی.
دی وايي:
"موږ د پاکستان ادعا واورېدله چې د ترهګرۍ ضد جګړه کې یې بری موندلی، خو راځئ چې دغه ادعاو ته یې یو ځل وګورو:
- پاکستان دا حقیقت ردولی شي چې د ملګرو ملتونو لهخوا پېژندل شوي ۱۳۲ ترهګر او ۲۲ ترهګرو ډلو ته یې تر اوسه پناه نه ده ورکړې او ملاتړ یې نه کوي؟
- پاکستان به دا رد کړي چې د ملګرو ملتونو له خوا پېژندل شوی ترهګر حافظ سعید په دغه هېواد کې دننه ازاد ګرځي او په انتخاباتو کې کاندیدان دروي؟"
ګمبیر دا خبرې د ملګرو ملتونو په درې اویایمه عمومي اسمبلۍ کې د پاکستان بهرنیو چارو د وزیر شاه محمود قریشي د شنبې ورځې تر خبرو وروسته وکړې چې هند یې په پاکستان کې د ځینو مرګونیو بریدونو ذمه وار وباله.
ګمبیر وویل چې هند په پاکستان کې په ترهګرو بریدونو تل خواشیني ښودلې او په دغو بریدونو کې د هند په ښکېلولو سره پاکستان وژل شویو بې ګناه انسانانو ته سپکاوی کوي.
په ملګرو ملتونو کې د هند دې ډیپلوماتې که څه هم د پاکستان د تورونو د ځواب په نوبت کې دا خبرې وکړې، خو تر هغې مخکې د هند بهرنیو چارو وزیرې سوشما سواراج هم په خپله وینا کې پاکستان د سیمې په ټولو ناکراریو کې ښکېل وباله.
خو پاکستان بل څه وايي.
د پاکستان بهرنیو چارو وزیر شاه محمود قریشي د ملګرو ملتونو په عمومي اسمبلۍ کې وویل چې په پاکستان کې ګڼ ترهګر بریدونه د هند په ملاتړ شوي.
هغه وویل، پاکستان د ترهګرۍ پروړاندې ډېره مبارزه کړې، خو هند یې په کراره نه پریږدي.
قریشي زیاته کړه:
"زموږ ختیځ ګاونډی هېواد لا هم د پاکستان پرضد ترهګر پالي. پاکستان به د پېښور پر یوه ښوونځي باندې د ماشومانو ټولوژنه او د مستونګ مرګونی برید چې د هند له ملاتړ برخمنو ترهګرو کار وو، هېڅکله له یاده ونه باسي."
پهدې تورونو سربېره په کشمیر کې د هند او پاکستان همیشنۍ لانجه هم د دواړو هېوادونو د استازیو د وینا یوه اصلي برخه جوړوله.
د پاکستان بهرنیو چارو وزیر شاه محمود قریشي وویل چې هند د کشمیر په اشغال سره ترهګري پالي او پر خلکو ظلمونه کوي.
خو په ملګرو ملتونو کې د هند ډیپلوماتې اینم ګمبیر پاکستان د کشمیر په اړه په سرغړویو او وژنو تورن کړ او ټینګار یې وکړ چې کشمیر به د هند خاوره وي او پاتې به شي.
صفيالله ستانکزی
