د امریکا ملي امنیت سلاکار جان بولټن وايي، سپینه ماڼۍ پر ایراني اقتصاد د فشار اچولو لپاره د دغه هیواد د تېلو پر سېکټر بندیزونه لګوي خو له دې یې موخه دا نه ده چې د ایران پر تېلو تکیه کوونکي ملګري او اتحادي هېوادونه زیانمن کړي.
بولټن د اکتوبر په ۳۱مه په واشنګټن کې یوې غونډې ته د وینا پرمهال دغه څرګندونې وکړې. ښايي دا به د سپینې ماڼۍ د هغه حکم د نرمولو لور ته اشاره وه چې ویلي یې وو، ټول هیوادونه دې له ایرانه تېل اخېستل ودروي.
وروسته له هغې چې امریکا د ایران او د نړۍ د ځواکمنو هیوادونو تر منځ د ۲۰۱۵ کال له جوهري تړونه ووته، د نومبر له پنځمې نېټې راهېسې پر ایران د بندیزونو د بیا لګولو لړۍ پیلول غواړي.
خو واشنګټن دا هم په پام کې لري چې د خپلو ځینو ملګریو او اتحادي هیوادونو په غوښتنه د بندیزونو له دې نړۍ ځینې هېوادونه مبرا وساتي. په دغو هېوادونو کې ترکیه او هند شامل دي. تر څنګ یې جنوبي کوریا عراق او افغانستان هم د خپلو تېلو د ضرورتونو د پوره کولو لپاره پر ایران تکیه کوي.
