له شمالي وزیرستانه د قامي اسمبلۍ غړي محسن داوړ ویلي، وفاقي حکومت د قبایلي سیمو د اصلاحاتو لپاره د اړینو مالي پانګو ورکولو کې پاتې راغلی دی.
نوموړي د جنورۍ پر ۲۵مه مشال راډیو ته وویل چې حکومت لا په دې نه دی توانېدلی چې په قامي مالیاتي کمیشن [اېن اېف سي] اېوارډ کې قبایلي ضلعو ته د مالي پانګو ورکولو پر معامله ټولې صوبې رضا کړي.
"د مرکزي حکومت دا دریځ دی چې د قبایلي ضلعو لپاره د مالي پانګو ورکولو معامله تر اېن اېف سي غونډې وروسته پرېکړه کوي خو تر اوسه هېڅ هم نه ده شوي."
دا په داسې حال کې ده چې د جنورۍ پر ۲۳مه په پېښور کې د وزیر اعلا محمود خان په مشرۍ د اپیکس کمېټۍ په غونډه کې د ۳۰ زره خاصه دار او لیویز ځواکونه په پولیسو د ورګډولو او په قبایلي ضلعو کې د عدالتي نظام جوړولو پرېکړه وکړه.
د اطلاعاتو وزیر شوکت یوسفزي تر غونډې وروسته مشال راډیو ته وویل چې د پرېکړو د عملي کولو لپاره به مالي پانګې له وفاقي حکومته غواړي.
د یادونې وړ ده چې سپریم کورټ صوبايي حکومت ته په شپږو میاشتو کې دننه د عدالتي اصلاحاتو عملي کولو امر ورکړی.
