پراګ - د امریکا ولسمشر ډونلډ ټرمپ وايي، راتلونکې اوونۍ به وکولای شي چې د داعش د وسله والې ډلې عملاً ماته اعلان کړي.
ولسمشر دا خبره د فبرورۍ پر شپږمه په واشنګټن کې د داعش د وسله والې ډلې ضد د ۷۹ غړیو هېوادنو د اېتلاف راټولو شویو چارواکو ته په وینا کې وکړه.
نوموړي وویل: "د امریکا پوځ، زموږ د اېتلاف غړي او د شام ډېموکراټو ځواکونو، په شام او عراق کې عملاً ټولې هغه سیمې ازادې کړې دي چې مخکې د داعش وسله والې ډلې په لاس کې وې."
ولسمشر ټرمپ له شامه د امریکايي ځواکونو د وتلو په اړه خپلې پرېکړې ته په اشاره وویل: "موږ په تمه یوو چې خپلو سرتېرو ته کور ته پر ستنېدو تود هرکلی ووایو."
ولسمشر ټرمپ د ډېسېمبر په میاشت کې له شامه د ۲۰۰۰ امریکايي سرتېرو د ایستلو په اعلان د امریکا د کانګرس غړي او خپل نړیوال متحدان حیران کړي ول.
