پراګ - ايران پر پاکستان غږ کړی دی چې د هغو وسله والو پر ضد دې کاروايي وکړي چې د تهران په وینا د فبرورۍ پر ۱۳مه یې له پولې سره نږدې د ايران د اسلامي انقلاب ساتونکي ځواک ۲۷ تنه وژلي ول.
د ایران په جنوب ختیځ کې د دې برید مسوليت جېش العدل منلی و.
د ایران سرکاري رسنۍ نن د انقلاب ساتونکی ځواک د قومندان جنرال محمد علي جعفري په حواله ویلي، که پاکستان خپلې ذمه وارۍ نه پوره کوي نو ایران به له ترهګرو د بدل اخیستو لپاره پخپله سزا ورکړي.
ايران تور پورې کوي چې جېش العدل سني سختدريځه ډله په پاکستان کې مېشته دی او د پاکستان حکومت پناه ورکړې ده. پاکستانيو چارواکو د ایران لخوا د دې تازه تورونو په اړه لا څه نه دې ویلي.
