په کراچۍ کې یو نومیاتی مذهبي عالم مفتي تقي عثماني د ګاډو پر کاروان د ناپیژاندو وسله والو په ډزو کې دوه ساتونکي وژل شوي او دوه نور کسان ټپيان شوي دي.
له کراچۍ د ډیوې راډیو خبر ورکوي چې برید د کراچۍ په ګلشن اقبال سیمه کې شوی دی.
د ګلشن اقبال پولیس چارواکي وايي، په برید کې د کراچۍ د دیني مدرسې دارلعلوم مشر مفتي تقي عثماني خوندي پاتې شوی دی.
د جناح روغتون ډاکټران وايي، په ټپي شویو دوو کسانو کې د یو ټپونه د اندیښنې وړ دي.
د برید ذمه واري لا چا نه ده منلې.
د کراچۍ د پولیسو مشر ویلي په دغه اړه يي پلټنې پیل کړي دي او د مفتي تقي عثماني د امنیت لپاره يي نور ساتونکي ګمارلي دي.
