د پښتون ژغورنې غورځنګ مشر منظور پښتین وايي ، د پاکستان پوځ په وزیرستان کې ښخ کړي ماینونه نه پاکوي.
نوموړي د نومبر پر ۱۵مه مشال راډیو ته وویل چې دا ماینونه پوځ د خپلو مورچو په شاوخوا کې ښخ کړي وو او اوس یې هغه زیاتره موچې پرېښې دي.
ده وویل ، دا واړه بمونه په ټولو قبایلي سیمو کې شته خو زیاتره په جنوبي او شمالي وزیرستان کې ښخ کړل شوي دي.
د دې بمونو په چاودنو کې لږ تر لږه ۱۵۰ کسان په نښه شوي دي چې زیاتره پکې ماشومان دي.
د پاکستان حکومتي او پوځي چارواکو وړاندې ویلي وو چې دا ماینونه پاکوي خو په دې اړه یې تفصیل نه دی ورکړی چې څومره یې پاک کړي او څومرې پاته دي.
