د ملګرو ملتونو د مشر انتونیو ګوتېرش ویاند د اکتوبر پر ۲۴مه په بیان کې ویلي چې د اټومي وسلو د بندیز تړون به د ۲۰۲۱ز د جنورۍ پر ۲۲مه عملي شي.
د اټومي وسلو د ختمولو کیمپېن په بیان کې ویلي چې هونډوراس پرون دا تړون منظور کړ چې معنا یې دا ده چې دا نړیواله موافقه به د درو میاشتو په موده کې نافذه شي.
دې نړیوال کیمپېن د موافقې د عملي کولو لپاره هلې ځلې کړې دي او په ۲۰۱۷ز کال کې یې د سولې نوبېل انعام وګاټه.
د کیمپېن مشرې پیټریس فېن په بیان کې ویلي چې دا ګړۍ د جاپان پر هېروشیما او ناګاساکي ښارونو د اټومي بمونو ورولو ۷۵ کاله وروسته راغلې.
د هغې په خبره، ملګرو ملتونو جوړېدو پر وخت هم ویل شوي ول چې اټومي وسلې به ختموي. د سره صلیب نړیوالې ادارې مشر پیټر ماورر دا تړون د ((بشریت د بریا)) بللې ده.
دا موافقه د اټومي وسلو پر استعمال، جوړولو، تیاري، ازموینې، زخیره کولو او د استعمال پر ګواښ بندیز لګوي.
دا موافقه د ملګرو ملتونو عمومي اسمبلۍ/جرګې د ۲۰۱۷ز کال په جون کې د ۱۲۲ هېوادونو په منظورۍ، ومانه.
خو اټومي وسلې لرونکي هېوادونو لکه امریکا، برتانیې، فرانسې، چین او روسیې دا موافقه نه ده لاسلیک کړې.
