د امریکا د بهرنیو چارو وزیر اېنټوني بلينکېن د اپرېل پر دویمه وویل، دا بندیزونه نه مناسب ول او نه هم ګټور.
په دې بندیزونو کې د فاتو بېنسودا په ګډون د دې نړیوال عدالت یو شمېر نور مشران په نښه شوي ول چې امریکې ته یې پر ورتګ بندیز لګېدلی و او هلته یې شتمنۍ کنګل شوې وې.
امریکا تېر کال د جنایي جرمونو نړیوال عدالت یا 'ای.سي.سي' چې مرکز یې د هالېنډ په هاګ ښار کې دی، د امریکا له ملي حاکمیته له سرغړونې وروسته تر هغې تورنه کړه چې دې عدالت په افغانستان کې د هغو جنګي جنایتونو د پلټنو امر وکړ چې د افغان ځواکونو، طالبانو او امریکایي سرتېرو له لوري له ادعا سره سم شوي دي.
بلينکېن وویل، د بندیزونو پر لرې کېدو سربېره واشنګټن د افغانستان او فلسطین په برخه کې د جنګي جرمونو د نړیوال عدالت له اجراآتو سره سخت مخالف دی او امریکا او اسراییل د دې عدالت غړیتوب نه لري چې حکم یې پرځای کړي.
د جنایي جرمونو نړیوال عدالت د امریکا د بندیزونو لرې کېدو د پریکړې هرکلی کړی دی.
