د پاکستان بهرنيو چارو وزير شاه محمود قريشي وايي، په افغانستان کې د امن له راتلو سره به د سيميزتړون لاهم پیاوړی شي او پرمختګ ترلاسه کول به ممکن شي.
نوموړی دا خبره د اپرېل پر ۲۹مه په اسلام اباد کې خپل جرمني سيال هايکوماس سره د ملاقات پر مهال کړې ده.
د بهرنيو چارو وزارت په يو بيان کې ويلي چې دواړو مشرانو د کورونا جهاني وبا، دوه اړخيزه اړيکو، د سيمې پر حالاتو او د افغانستان سولې بهير په اړه خبرې اترې وکړي.
شاه محمود قرېشي وويل چې د جرمني بهرنيو چارو وزير افغانستان ته تلو له مخه دا ضروري وګڼله چې د پاکستان له دریځه ځان خبر کړي.
د ده په خبره پاکستان پرامنه او باثباته افغانستان غواړي او د افغانانو په ملکيت د امن مذاکراتو ملاتړ کوي او په دې لړ کې به خپلې هلې ځلې جاري وساتي.
