د پاکستان پیپلز ګوند نوماند قادر خان مندوخېل د کراچۍ د قامي اسمبلۍ پر څوکۍ د اپرېل پر ۲۹مه شوي انتخابات ګټلي دي.
له نننیو نارسمي نتیجو سره سم، نوموړي۱۶،۱۵۶ رایې ګټلې دي.
د مسلم لیګ (ن) نوماند مفتاح اسماعیل په انتخاباتو کې ۱۵،۴۷۳ او د تحریک لبیک پاکستان ډلې مفتي نذیر احمد کمالوي ۱۱،۱۲۵ ووټونه ترلاسه کړي.
د پاکستان حکومت روانه میاشت تر قهرجنو مظاهرو وروسته پر تحریک لبیک ډلې بندیز ولګاوه.
د قامي اسمبلۍ د ۲۴۹مې حلقې څوکۍ په مارچ کې د پاکستان تحریک انصاف سیاستوال فیصل واوډا تر استعفا وروسته خالي شوې وه.
نوموړي د غبرګ شهریت لرلو تر تورونو وروسته استعفا ورکړې وه خو د مارچ په پیل کې سېنېټر منتخب شو.
د پاکستان پیپلز ګوند مشر بلاول بوټو زرداري د اپرېل پر ۲۹مه نیمه شپه پر ټوېټر د کراچۍ اوسېدونکو مننه وکړه خو د مسلم لیګ (ن) یوې مشرې مریم نواز تور پورې کړ چې د ووټونو په شمار کې درغلي شوې.
نوموړې پر ټوېټر په بیان کې له انتخاباتي کمېشنه غوښتي چې د انتخاباتو نتیجه دې نه اعلانوي.
انتخاباتي کمېشن د کراچۍ د قامي اسمبلۍ د څوکۍ رسمي نتیجه لا نه ده اعلان کړې.
