د افغانستان د حج او اوقاف وزارت وايي، د مصر ستر مفتي شوقي ابراهیم عبدالکریم علام په افغانستان کې د سولې په اړه فتوا خپره کړې ده.
وزارت د مې پر ۲۷مه په بیان کې د مصر د مفتي اعظم له خولې لیکلي چې سوله د "اسلام یو مهم اصل" دی او "په خپله اسلام سولې ته وايي"، خو په افغانستان کې ورته لږ پام شوی دی.
علام ویلي چې په اسلام کې د خلکو خوندیتوب لپاره د ګڼو مقرراتو یادونه شوې او همدا لامل دی چې اسلام پر نورو حمله، د نورو روغتیا ته خطر پېښول یا د نورو وېرول منع کړي دي.
نوموړي دا څرګندونې پر داسې مهال کړې دي چې په افغانستان کې تاوتریخوالي او جګړو زور اخیستی دی.
په وروستیو کلونو کې د سعودي عرب، انډونېشیا او یو شمېر نورو هېوادونو دیني عالمانو هم په افغانستان کې د روانې جګړې خلاف فتوې خپرې کړې دي.
