د افغانستان ځینو رسنیو خبر ورکړی چې په کابل کې د درېيم سېپټېمبر په شپه په هوايي ډزو کې ۱۷ کسان وژل شوي دي.
شمشاد او طلوع دواړو ټېليويژنونو دا خبر ورکړی دی.
د طالبانو د فرهنګي کميسيون مرستيال مشر احمدالله وثیق مشال راډیو ته ویلي چې دا ډزې د پنجشېر د سقوط په اړه د ناسمو راپورونو له خپرېدو وروسته د طالبانو وسله والو کړې دي.
وثیق د ډزو له وجې د مرګ ژوبلې په اړه څه ونه ویل، خو زیاته یې کړه چې د طالبانو يو مرستیال مشر مولوي محمد یعقوب مجاهد په راتلونکو کې د دې پېښو د مخنیوي لپاره امنیتي چارواکو ته سپارښتنه کړې ده.
بلخوا د جلال اباد د حوزوي روغتون ویاند ګلزاده سنګر هم ویلي دي چې په ننګرهار کې د دې ډزو له کبله ۱۴ کسان ټپیان شوي دي.
دا په داسې حال کې ده چې د سېپټېمبر پر څلورمه هم په پنجشېر کې د طالبانو او مقاومتي ډلو ترمنځ د نښتو راپورونه دي.
پنجشېر یوازینی ولایت دی چې یو شمېر اوسېدونکو یې د طالبانو له واکمنۍ سره مخالفت ښودلی او له دې ډلې سره یې د یو ځای کېدو لپاره خپل شرایط وړاندې کړي دي.
