د طالبانو کورنیو چارو وزارت وایي، د کابل ښار لوېدیزه څنډه کې چاودنې یو تن وژلی او ۶ نور یې ټپیان کړي دي.
د دې وزارت ویاند سعید خوستي مشال راډیو ته وویل چې چاودنه د نومبر پر ۱۷مه د ۱۳مې حوزې په نقاش سیمه کې پر یوه ټونس ډوله موټر شوې او په خبره یې ټپيانو کې میرمنې هم شاملې دي.
د تېرې دوشنبې په ورځ د کابل په کوټه سنګي کې چاودنې دوه تنه ملکیان ټپیان کړل.
له هغه دوه ورځې وړاندې ورته چاودنې یو کس وواژه او څلور نور یې ټپیان کړل.
د نننۍ چاودنې مسولیت لا کومې وسله والې ډلې نه دی منلی، خو د تېرو دوو چاودنو مسولیت داعش وسله والې ډلې منلی و.
د کابل په لویدیځ او ۱۳مه حوزه کې ډېر شیعه افغانان اوسېږي چې ډېر کله د داعش د بریدونو هدف وي.
