د خيبر پښتونخوا په ټانک چدهړ کې د ډېسېمبر پر ۱۱مه، وسله والو پر پولیو ټیم بريد کې، يو پوليس سرتېری وژلی او بل يې ژوبل کړی دی.
د ټانک تاڼې مشر نور اسلم د ډېسېمبر پر ۱۱مه مشال راډيو ته وويل چې دوه پولیس سرتېري اقبال خان او تاج د ګوزڼ ټيم په حفاظت مامور وو چې پرې وسله والو بريد وکړ.
په بريد کې د ګوزڼ کار کوونکیو ته زیان نه دی رسېدلی. د برید ذمه واري تحريک طالبان پاکستان منلې ده.
دا بريد تر هغې وروسته شوی چې ناقانونه وسله والې ډلې تحریک طالبان پاکستان د ډېسېمبر پر ۱۰مه، له وفاقي حکومت سره د یو میاشتني اوربند د نه غځولو اعلان وکړ.
په خیبر پښتونخوا صوبه کې د ډېسېمبر پر ۱۰مه ماشومانو ته د ګوزڼ څاڅکو ورکولو پينځه ورځنی کمپاين پيل شوی. د ملک په نورو برخو کې دا بهیر د ډېسېمبر له ۱۳مې پیلېږي.
د پاکستان روغتیا وزارت ویلي چې په ټول پاکستان کې به له ۴۰ میلیونو څخه زیاتو هغو ماشومانو ته د ګوزڼ څاڅکي ورکول کېږي چې عمرونه یې له پينځو کالو نه کم وي.
