په لاهور کې د پاکستان او اسټراليا ترمنځ کرکټ ټيسټ لوبې نن (مارچ ۲۳مه) دريېمه ورځ ده.
د دواړو هېوادونو ترمنځ دا د دې لړۍ دريېمه او وروستئ ټېسټ لوبه ده. دا وخت د پاکستان لوبغاړي بېټنګ کوي. تر دې مخکې اسټراليا په خپل لومړي اننګز کې د ټولو لوبغاړو په سوځېدو ۳۹۱ رنزونه جوړ کړل.
د پاکستان او اسټراليا ترمنځ لومړۍ دواړه لوبې مساوي پاتې شوې وې. اسټراليا او پاکستان به د ټیسټ لوبو تر ختمېدو وروسته، درې ۵۰ اووریزې او يوه شل اووریزه لوبه کوي.
دا تر ۱۹۹۸ کال وروسته لومړی ځل دی چې د اسټرالیا د کرکټ ملي لوبډله د پاکستان په سفر ده. دوی په پاکستان کې د بې امنۍ له وجې کرکټ نه کاوه.
