د روس مطبوعات څارونکي د هېواد خبري رسنیو ته خبرداری ورکړی چې د اوکراین د ولسمشر مرکه نشر نه کړي.
د میډوزا په نوم وبپاڼې خبر ورکړی چې اوکرایني ولسمشر ولوديمير زيلېنسکي د مارچ پر ۲۷مه د دوی په ګډون څلورو روسي رسنیو سره تر شاوخوا ۹۰منټه پورې مرکه کړې وه
نوموړي ویلي چې په دې مرکه سره یې غوښتل چې روسیه د جګړې په حقایقو پوه شي.
د روس مطبوعات څارونکي د مارچ پر ۲۷مه په یو بیان کې ویلي چې رسنۍ دې دا مرکه نه نشروي او د ده په وینا، د هغو څلور رسنیو پرضد یې څېړنه پیل کړې ده چې دا مرکه یې کړې وه.
روسیې د فبرورۍ پر ۲۴مه پر اوکراین له یرغل کولو راهیسې د دې لپاره د معلوماتو پر ازادۍ ولقه لا ټینګه کړې چې خلک یوازې د دوی پر وینا باور وکړي.
