د بلوچستان له اواران سره نږدې په کاهان سیمه کې له وسله والو سره په نښته کې یو پوځي وژل شوی دی.
د پاکستاني پوځ د عامه اړیکو څانګې ( ای ایس پي ار) د اپرېل پر ۲۲مه ویلي چې تېره شپه وسله والو د امنیتي ځواکونو پر یوه پوسته حمله وکړه چې دوی په شا وتمبوله.
د پوځ په بیان کې ویل شوي چې د سختو ډزو پر مهال د پوځ یو مېجر ووژل شو او یو بل پوځي ژوبل شو.
پوځ ادعا کوي چې وسله والو ته یې هم سخت زیانونه رسولي دي.
د پېښې په اړه تر اوسه کومې وسله والې ډلې څه نه دي ویلي.
خو تر دې مخکې په بلوچستان کې پر پوځ د وسله والو حملو زیاتره ذمه وارۍ بلوڅ بیلتون پالې ډلې په غاړه اخلي.
