امریکا وايي غواړي چې له پاکستان سره د ترهګرۍ د مخنیوي او د پولو د امنیت پر چارو کار وکړي.
د امریکا د بهرنیو چارو د وزارت ویاند نیډ پرایس د مې پر۴مه په واشنګټن کې یوې خبري غونډې ته د وینا پر مهال وویل له پاکستان سره دوه اړخیزه اړیکو ته اهمیت ورکوي او غواړي چې له پاکستان سره پر هغو چارو کار وکړي چې د دواړو هیوادونو په ګټه دي.
پرایس وويل چې په دې کې د ترهګرۍ ضد مبارزه او د سرحدونو امنیت مهم دي.
د یوې پوښتنې په ځواب کې نیډ پرایس یو ځل بیا د کراچۍ په پوهنتون د ځانمرګي برید غندنه وکړه.
په کراچۍ پوهنتون کې، د اپریل پر ۲۶مه، يوه ځانمرګې حمله شوې وه چې پکې د درو چينايانو استادانو په ګډون څلور کسان وژل شوي وو. له پاکستانه ازادۍ اخیستو لپاره وسله واله مبارزه کوونکې، ډلې بلوچ لیبرېشن ارمي (مجیدبریګېډ) د دې حملې زمه واري منلې وه.
ښاغلي پرایس وویل هر چېرته چې ترهګر برید کیږي، هغه د ټول انسانیت سپکاوی دی خو که په یو پوهنتون یا مذهبي ځای کې ترسره شي نو بیا په ریښتیا د بشریت ناقدري ده.
