اوکراینيو ځواکونو د هېواد په ختیځ کې د روسیې د نویو بریدونو پروړاندې د دفاع تیارۍ پیل کړې دي.
کییف د مې ۱۶مې د حملو پروړاندې دا هڅې پر داسې مهال پیل کړې دي چې ناټو سازمان ویلي دي چې د مسکو یرغل له پلان سره سم نه دی روان او د دونباس سیمې د نیولو هڅې یې ټکنۍ شوې دي.
اخوا د مې پر ۱۵مه شپې ناوخته اوکرایني ولسمشر وولودیمیر زېلېنسکي په وینا کې وویل، پر دونباس د روسیې د نویو حملو د هڅو پروړاندې د مقاومت تیاری کوي ځکه چې مسکو "غواړي په یو نه یو ډول د اوکراین په جنوب کې خپل حرکت قوي کړي."
زېلېنسکي زیاته کړه چې "قبضه ګر اوس هم نه غواړي ومني چې بندې کوڅې ته داخل شوي دي او د هغوی تش په نوم 'ځانګړي عملیات' دېوالیه شوي دي."
پر اوکراین د روسیې یرغل له سخت مقاومت سره مخامخ دی او همداراز ځواکونه یې ګڼې لوجېسټيکي ستونزې لري.
داسې ښکارېده چې د مسکو لومړی هدف د اوکراین پراخې سیمې نیول او د هغه هېواد حکومت ړنګول ول. خو مسکو د کییف په نیولو کې تر پاتې راتګ وروسته د پلازمېنې له شاوخوا سیمو څخه خپل سرتېري ایستلي او د اپرېل له نیمايي راهیسې یې د اوکراین پر ختیز تمرکز کړی دی.
