د ازبکستان د بهرنيو چارو وزارت وايي، د افغانستان په اړه د نړیوال کنفرانس د دایرولو لپاره چمتووالی نیسي.
وزارت د جولای پر ۱۲مه ناوخته په بیان کې ویلي چې تاشقند په دوو اوونیو کې د څه باندې ۲۰ هېوادونو او نړیوالو موسسو د استازو جرګه جوړوي چې په افغانستان کې پر روان حالت وغږېږي.
اخوا د طالبانو د حکومت ویاند ذبیح الله مجاهد د جولای پر ۱۲مه نېټه مشال راډيو ته وويل چې د دوی له اړخه به د بهرنیو چارو سرپرست وزیر امير خان متقي په ناسته کې ګډون وکړي.
په جون میاشت کې د ازبکستان د ملي امنیت سلاکار عبدالعزیز کاملوف په کابل کې د طالبانو د حکومت د ريیس الوزرا له مرستیال ملا عبدالغني برادر سره په کتنه کې د هغې غونډې په اړه خبرې کړې وې.
د غونډې د اجنډا په اړه ډېر څه نه دي ویل شوي او دا هم لا څرګنده نه ده چې کوم هېوادونه به پکې ګډون کوي.
طالبانو د ۲۰۲۱ز کال د اګست په نیمايي کې کابل ونیو او پر افغانستان واکمن شول. هغوی شاوخوا درې اوونۍ وروسته خپل لنډمهالی حکومت اعلان کړ چې تر اوسه د نړۍ هېڅ هېواد په رسمیت نه دی پېژندلی.
