په ډېره اسماعیل خان کې وسله والو پر یوې مدرسې د لاسي بم برید کړی دی چې پکې درې زده کوونکي ژوبل شوي دي.
د ډېره اسماعیل خان د پهاړپور پولیس چارواکو د سېپټېمبر پر ۱۲مه ویلي دي چې پر موټرسایکل سپرو دوو وسله والو د اتوار (یکشنبې) تر ماښام لمانځه وروسته په وادي تاج کالونۍ کې د دارالفتح مدرسې له تالاره بهر د لاسي بم برید وکړ چې پکې دوه زده کوونکي سخت او یو سرسري ټپي شول.
د سیمې یوه خبریال سعود مسید د پولیسو په حواله مشال راډیو ته وویل چې بریدګر د پېښې له ځایه تښتېدلي دي. دی وايي، ژوبل زده کوونکي په روغتون کې بستر شوي او پولیسو د پېښې پلټنې پیل کړې دي.
تر اوسه معلومه نه ده چې پر مدرسې برید چا او ولې کړی دی او د حملې ذمه واري هم چا نه ده منلې.
