پولیس وايي، په مردان کې په دوو جلا، جلا پېښو کې د دوو ښځو او درې ماشومانو په ګډون اووه کسان وژل شوي دي.
د مردان د پولیسو ویاند سلمان خان د اکتوبر پر ۱۲مه مشال راډیو ته وویل، لومړۍ پېښه د نهې (سې شنبې) پر ورځ په بخشالي کې شوې ده چې پکې یو سړي خپل زوی، نږور او درې لمسي وویشتل.
د ده په خبره، د پېښې لامل کورنۍ شخړه وه او د ملزم نیولو هڅې روانې دي.
خان وايي، د اکتوبر پر ۱۱مه په ګوجر ګړۍ کې یو سړي خپله ښځه او یو بل کس ووژل.
د پولیسو ویاند زیاتوي چې دا د ناموسي وژنې پېښه وه چې پکې یې د ککړتیا په تور درې کسان نیولي دي.
د خیبر پښتونخوا په ګډون په پاکستان کې وخت په وخت ناموسي وژنې کېږي.
د پاکستان بشري حقونو خپلواک کمېشن کلنی راپور ښيي چې په ۲۰۲۱ز کال کې په هغه هېواد کې ۴۷۸ ښځې د ناموس په نامه وژل شوې وې.
په پاکستان کې سرکاري شمېرې ښيي چې په تېرو پینځو کلونو کې يوازې د خيبر پښتونخوا په سوات کې د ۳۸ ښځو په ګډون ۷۰ کسان د "ناموسي وژنو" ښکار شوي دي. خو د بشري حقونو لپاره کاررکوونکي فعالان دا شمېر تر دې ډېر لوړ ښيي.
