د افغانستان لپاره د ملګرو ملتونو نوې ځانګړې استازې روزا اوتنبایوا په کابل کې له لوړ پوړو طالب چارواکو سره پر بېلابېلو موضوعاتو خبرې کړي دي.
اوتنبایوا د اکتوبر پر ۱۶مه د طالبانو د حکومت د ریس الوزرا له مرستیالانو عبدالسلام حنفي او مولوي عبدالکبیر سره لیدلي دي. نوموړې تر دې وړاندې د طالبانو د حکومت د بهرنیو چارو له سرپرست وزیر امیرخان متقي سره ملاقات کړی وو.
يوناما په دې اړه خپره کړې اعلاميه کې ويلي چې د طالبانو سره په دې تعرفي ملاقات کې د ښځو د تعليم او بشري حقونو په اړه خبرې شوې دي.
طالبانو د ۲۰۲۱ کال د اګست په ۱۵مه کابل ونيو. له هغه وروسته یې له شپږم ټولګي پورته د نجونو ښوونځي بند کړي، ښځو ته بغیر له نارينه محرمه له کوره وتل منع دي او پر رسنيو ځيني محدوديتونه لګول شوي دي.
