د اوکراين ولسمشر وولوديمیر زېلېنسکي ويلي چې نړۍ ته د اوکراينۍ غلې د لېږدولو له موافقې څخه د روسیې وتلو ته بايد "سخت نړيوال غبرګون" وښوول شي.
ولسمشر زېلېنسکي د اکتوبر پر ۲۹مه وويل چې د روسیې دا پرېکړه به په افریقا او اسيا کې د خوړو د کمښت او قحطۍ لامل شي.
روسیې د فبرورۍ په مياشت کې پر اوکراين یرغل وکړ او ګڼ ځايونه یې نيولي دي چې پکې د اوکراين هغه بندرونه هم شامل دي چې د هغه هېواد غله ترې د نړۍ بېلابېلو هېوادونو ته استول کېږي.
مسکو د ملګرو ملتونو په مینځګړتوب سلا شوی وو چې د غلې د برامد (صادرولو) مخه به نه نیسي خو د اکتوبر پر ۲۸مه یې وويل چې د کښتيو امنيت نه شي ساتلای نو ځکه "تر نامعلومې مودې" له موافقې وځي.
ملګرو ملتونو ويلي چې په دې اړه یې د روسيې له چارواکو سره خبرې روانې دي او غږ یې کړی چې مسکو دې له خپلې پرېکړې په شا شي.
د روسیې او اوکراين چارواکو د ۲۰۲۲ز کال د جولای پر ۲۲مه د ملګرو ملتونو ملاتړ لرونکی هغه تړون لاسليک کړی وو چې هدف يې د اوکراین غله په خوندي ډول د نړۍ بېلابېلو هېوادونو ته لېږدول ول.
تر هغې وروسته د اګست پر لومړۍ نېټه د اوکراین له اودېسا بندره په غلې بار لومړۍ بېړۍ روانه شوې وه.
