اوکرایني چارواکي وايي، روسیې د هغه هېواد په جنوب ختیځ کې پر بېخبنا (انفراسټرکچر) او ملکي اهدافو ډرون بریدونه کړي دي.
چارواکي وايي، د نومبر پر څلورمه په بریدونو کې داسې بې پیلوټه الوتکې کارول شوې دي چې پر اهدافو ورغورځي او خپله هم تباه کېږي.
دوی وايي، د همدې بریدونو له وجې ولسمشر وولودیمیر زېلېنسکي روسیه د "د انرژۍ پر ترهګرۍ" تورنه کړې ده.
د دنیپروپېتروفسک سیمې والي والنتین رېزنیچېنکو ویلي دي چې د ډرون بریدونو له وجې د برېښنا لېږد نظام ته خورا زیات تاوان رسېدلی دی او په مېلیونونو اوکراینیان له بجلۍ بې برخې دي.
ده وویل، اوکرایني پوځ په نېکوپول ولسوالۍ کې اته شهید-۱۳۶ ډوله بې پیلوټه الوتکې ویشتلې دي.
رېزنیچېنکو وویل، روسیو ځواکونو په هغه ولسوالۍ کې پر څلورو ابادیو د راکټونو او توپونو بریدونه وکړل چې پکې د ګیسو نللیکې او د برېښنا تارونه زیانمن شول او استوګنځایونه ړنګ شول.
اوکرایني ولسمشر وولودیمیر زېلېنسکي د نومبر پر درېیمه شپې مهال په خپله ویډیويي وینا کې وویل، د اوکراین ۱۰ فیصده ابادي چې څلور نیم مېلیونه کسان جوړېږي، په لنډمهالي ډول له برېښنا بې برخې شوي دي. ده دا اټکل تر جګړې مخکې په سیمو کې د ابادۍ پر اساس کړی دی. په فبرورۍ کې پر اوکراین د روسیې تر یرغل وروسته لکونه خلک بې کوره او کډوال شوي دي.
