ایرانیو چارواکو د ډېسېمبر پر ۱۲مه یو سړی د دوو امنیتي سرتېرو د وژنې په تور اعدام کړی دی.
دا د شاوخوا یوې اوونۍ په موده کې دویم کس دی چې په هغه هېواد کې د روانو مظاهرو پر مهال د تاوتریخوالي په تور اعدام شوی دی.
ایرانیو چارواکو د ډېسېمبر پر اتمه د محسن شکاري په نوم د یوه کس د پانسي کولو خبر ورکړی وو.
د ایران له عدلیې سره تړلي میزان خبري اژانس د ډېسېمبر پر ۱۲مه وویل چې په مشهد کې انقلابي عدلت مجید رضا رهنورد ته د "خدای پر وړاندې د بغاوت" پیلولو په تور د مرګ سزا ورکړې ده. په ایران کې د دې تور سزا مرګ ده.
عدالت داراز ویلي چې رهنورد په نومبر کې د احتجاجونو پر مهال د "بدنامه" بسیج نیمه پوځي ځواک دوه غړي په چاقو وهلي او وژلي ول.
بهرني هېوادونه د ایران پر انقلابي عدالت د دې له وجې نیوکې کوي چې هغوی تورن کس ته د وکیل ټاکلو او ان د تورن کس پر ضد د ثبوتونو لرلو اجازه نه ورکوي.
په هغه هېواد کې مظاهرې د سېپټېمبر پر ۱۶مه د مهسا امیني په نوم د یوې ۲۲ کلنې نجلۍ تر مړینې وروسته پیل شوې. هغه تر دې درې ورځې مخکې د ایران ګشت ارشاد په نوم اخلاقي پولیسو د حجاب قانون سرغړونې په تور نیولې وه. امیني د پولیسو په حراست کې بېهوښه شوې وه او بیا په روغتون کې ومړه.
چارواکو د هغې د مړینې لامل د زړه درېدل بللي ول خو د امیني کورنۍ او فعالان وايي چې هغه د پولیسو د تشدد له وجې مړه شوې وه.
