د پاکستان او ایران د بهرنیو چارو وزیرانو د طالبانو د حکومت د بهرنیو چارو له سرپرست وزیر سره خبرې کړي دي او دواړو په کابل کې د جنورۍ ۱۱مې خونړۍ چاودنه غندلې ده.
د طالبانو د حکومت د بهرنیو چارو وزارت پرون په دوو جلا جلا بیانونو کې وویل چې د پاکستان د بهرنیو چارو وزیر بلاول بوټو زرداري او د ایران د بهرنیو چارو وزیر حسین امیر عبدالهیان له امیرخان متقي سره په ټېلېفوني خبرو کې پر برید ((ژوره خواشیني)) ښوولې ده.
د بهرنیو چارو وزارت مخې ته د چاودنې ذمه واري د اسلامي دولت (داعش) ډلې خراسان څانګې منلې ده. په پېښه کې د مرګژوبلې په اړه ضد و نقیض معلومات خپاره شوي دي.
د بهرنیو چارو وزارت د یوې سرچینې په وینا، په چاودنه کې د وزارت ۱۶ کارکوونکي وژل شوي او لسګونه ټپیان دي.
خو د طالبانو د حکومت د کورنیو چارو وزارت په چاودنه کې د پینځو ملکي وګړو مړینه او د یوشمېر کسانو ژوبلېدل تایید کړي دي.
