په شمالي وزیرستان کې د فرورۍ له ۱۳مې د معذورونکي وایرس، پولیو پر ضد د واکسینو درې ورځنی کمپاين پيل شوی دی.
د شمالي وزیرستان ډپټي کمشنر ریحان ګل خټک د فرورۍ پر ۱۳مه مشال راډیو ته وویل چې په دې کمپاین کې به د ضلعې يو لاک او دوه څلوېښت زره هغو ماشومانو ته د پوليو یا ګوزڼ د مخنیوي څاڅکي ورکول کېږي چې عمرونه یې له پنځو کلونو کم وي.
د نوموړي په وینا د کمپاين د ۶۲۱ روغتيايي ډلو په مټ کيږي چې د امنیت لپاره یې کوټلي اقدامات شوي دي. خټک د سیمې له علماوو، مدني ټولنو او قبایلي مشرانو غوښتنه وکړه چې د پوليو ټيمونو ملاتړ وکړي.
په تېر ۲۰۲۲ کال کې په ټول پاکستان کې د پوليو ۲۰ کیسونه رپورټ شوي وو چې ۱۷ یې یوازې په شمالي وزیرستان کې دي. د پولیو دوه کېسونه په لکي مروت او یو په جنوبي وزیرستان کې رپورټ شوی دی.
پاکستان او افغانستان د نړۍ هغه یوازیني هېوادونه دي چې پکې د پولیو یا ګوزڼ وایرس لا هم موجود دی.
