د اېټالیې اسنا او یوشمېر نورو خبري اژانسونو ویلي دي چې د هغه هېواد له کلابرییا سیمې ساحل ته نېږدې په سمندرګي کې له ګټانو (ډبرو) سره د کډوالو یوې کښتۍ جنګېدو په پېښه کې ۳۳ کسان وژل شوي دي.
رسنۍ وايي دا پېښه د فبرورۍ پر ۲۶مه شوې او د کروتون ولایت په ساحلي سیلانۍ سیمه کې ۲۷ مړي موندل شوي دي.
اندروکرونوس خبري اژانس ویلي دي چې په هغه کښتۍ کې له ۱۰۰ زیات کډوال سپاره ول.
اژانس وايي، د پېښې له ځایه شاوخوا ۵۰ تنه ژغورل شوي دي.
اژانس وايي، هغه کښتۍ د خراب سمندري موسم له کبله له ګټانو سره وجنګېده.
په هغه کښتۍ د پاکستان، افغانستان او ایران کډوال سپاره ول.
د مرکزي مدېترانې یا د روم سمندرګي لاره د نړۍ له خطرناکو لارو ګڼل کېږي. په هغه سمندرګي کې اروپا ته تر رسېدو مخکې د کډوالو ګڼې نورې کښتۍ هم ډوبې شوي.
د کډوالۍ د نړیوال سازمان د شمېرو له مخې له ۲۰۱۴ز کال راهیسې په مدېترانې سمندرګي کې شاوخوا ۲۶،۰۰۰ کډوال ډوب شوي. له دې ډلې څخه یوازې ۲،۰۰۰ تنه په ۲۰۲۲ز کال کې مړه شوي دي.
