يو اروپايي چارواکي چين ته خبرداری ورکړی دی چې که تر سره کرښه تېر شي او روسيې ته وسلې ورکړي نو له بنديزونه سره به مخامخ شي.
رويټرز خبري اژانس وايي د اروپايي اتحاديې يو مشر چارواکي د مارچ پر دريمه ویلي چې که چین روسیې ته وسلې ورکړي نو " دا به بيخي تر سره کرښه تېرېدل وي."
د ده په خبره اروپايي اتحاديه به د دې په ځواب کې پر چين بنديزونه لګوي.
دا څرګندونې پر داسې وخت مخې ته راغلې دي چې تر دې يوه ورځ مخکې د جرمني وزیراعظم اولاف شولڅ ماسکو ته د داسې مرستو ورکولو خلاف چین ته خبرداری ورکړی وو.
د جرمني وزيراعظم خپل پارلېمان ته په وينا کې وويل، "يرغلګرې روسیې ته هېڅ ډول وسله مه ورکوئ."
بلخوا چين وايي روسیې ته د وسلو ورکول هېڅ اراده نه لري. دا په داسې حال کې ده چې پر اوکراین د روسیې د یرغل یو کال پوره شوی خو لا هم جګړه روانه ده.
