د اسلامي دولت وسلوالې ډلې يا داعش خراسان څانګې په کابل کې د بهرنيو چارو وزارت ودانۍ مخې ته د بريد مسوولیت منلی دی.
رویټرز اژانس تېره شپه (د مارچ پر ۲۷مه) ناوخته د داعش د ټېليګرام چېنل په حواله دا خبر ورکړی دی.
په کابل کې د بهرنیو چارو وزارت د ودانۍ مخې ته په پرونۍ چاودنه کې د یو ماشوم په ګډون شپږ کسان ووژل شول او ۱۲ نور ژوبل شول.
په افغانستان کې د ملګرو ملتونو مرستندويه دفتر (يوناما) په کابل کې د دغې چاودنې په اړه په غبرګون کې ویلي چې دا ډول حملې "د منلو وړ نه دي".
یوناما په دې اړه په یوه ټویټ کې وویل، دا د منلو وړ نه ده چې پر افغانانو د عادي ژوند په حال کې حملې کېږي.
داعش د دغه برید مسولیت داسې مهال منلی چې د مارچ پر ۲۶مه د طالبانو د حکومت استخباراتو وویل چې يوه اوونۍ وړاندې یې مزار شریف کې د داعش درې مهم مشران وژلي دي.
د افغانستان د سولې لپاره د امریکا پخواني ځانګړي استازي زلمي خلیلزاد د مارچ پر ۲۷مه پر خپله ټویټرپاڼه ولیکل چې د داعش خلاف عملیات له دغې ډلې سره د مبارزې په برخه کې د طالبانو د ژمنو عملي کول دي.
