د امریکا پخوانی ولسمشر ډانلډ ټرمپ د خپل کاروبار په اړه د "ناسمو معلوماتو" ورکولو په ۳۴ قضیو کې تورن شوی دی.
نوموړي د اپرېل پر څلورمه د نیو یارک یوه عدالت ته د حاضرېدو پر ځان لګېدلي تورونه رد کړل او و يې وويل چې "بېګناه" دی.
څارنوالانو په یوه قضیه کې دی تورن کړی چې دوو ښځو ته یې له ده سره "د جنسي اړیکو پټولو" لپاره پیسې ورکړې دي.
د ټرمپ پر ضد د دعوې په متن کې ادعا شوې چې هغه د ۲۰۱۶ز کال د ولسمشرۍ د انتخاباتو په درشل کې د ځان په اړه د "منفي معلوماتو" خپرولو په مخنیوي کولو د انتخاباتو قانون مات کړی دی.
ټرمپ د امریکا په برحاله او متقاعدو ولسمشرانو کې لومړی کس دی چې جنايي تورونه ورباندې لګېدلي دي.
د ټرمپ مدافع وکیل ټاډ بلانچ بیا ویلي دي چې د قضيې تر پایه به د خپل موکل دفاع ته دوام ورکړي.
