د افغانستان لپاره د امریکا ځانګړی استازی تامس وېسټ د قطر، متحده عربي اماراتو او ترکیې په سفر دی.
د امريکا د بهرنيو چارو وزارت د اپرېل پر ۱۱مه په يوه خبرپاڼه کې ويلي چې ټام وېسټ د اپرېل له ۱۱مې څخه تر ۱۸مې په هغو هېوادونو کې کتنې کوي.
د خبرپاڼې له مخې، ټام وېسټ په دوحه کې د امريکا له قطري همکارانو، د افغانستان د مدني ټولنې له مشرانو او د ملګرو ملتونو له استازو سره ګوري.
ټاکل شوې چې نوموړی وروسته په متحده عربي اماراتو کې له ځايي چارواکو، افغان سوداګرو او د نظر له خاوندانو سره ليده کاته وکړي.
په بیان کې راغلي، تر دې وروسته به ټام وېسټ په استنبول کې له افغان سیاسي مشرانو، خبريالانو، د بشردوستانه چارو له متخصصینو او د بشري حقونو له فعالانو سره سلا مشورې وکړي.
د امريکا د بهرنيو چارو وزارت وايي، په سیمه کې د خلکو نظرونه غونډوي ځکه چې نړیواله ټولنه د افغانستان د پېچلو ننګونو (چیلېنجونو) لپاره د حل په لټه کې ده.
یاد وزارت زياتوي چې د طالبانو د وروستیو پرېکړو له امله په بشري چارو کې د ښځو د ګډون محدودول او د ملګرو ملتونو په دفترونو کې هغوی له حیاتي کاره منع کول په افغانستان کې ستونزې لا زياتې کړې دي.
