د خیبر پښتونخوا د باجوړ عنایت کلا بازار کې وسلوالو يو کس په ډزو وژلی او بل یې زخمي کړی دی.
د باجوړ پولیسو مشال راډيو ته ويلي چې په ګول مارکېټ کې د اپرېل پر ۱۸مه وسلوال بريد کې ۲۰ کلن معاذ وژل شوی او ۱۸ کلن شاه حسين ټپي شوی دی.
د معاذ پلار مفتي بشير احمد هم د تېر کال (۲۰۲۲ز) په اپرېل میاشت کې د روژې پر ۲۷مه وژل شوی وو. نوموړی د جمعيت علمای اسلام (ف) غړی وو. د هغه تر وژنې وروسته د دې ګوند غړو احتجاجونه کړي ول.
په باجوړ کې د اپرېل پر نهمه هم د نامعلومو وسلوالو په برید کې د جماعت اشاعت والسنت یو ځایي مشر او د ديني مدرسې مهتمم مولانا ګل نصیب وژل شوی او یو بل ملګری یې ژوبل شوی وو. تر اوسه چا د دې بريدونو ذمه واري نه ده منلې.
