اوکراین وایي، د بخموت ښار مهمې سیمې يې د ځواکونو په لاس کې ده.
د اوکراین د ځمکني پوځ یو لوړ پوړي قومندان اولیکساندر سېرېسکي دا خبره له هغه وروسته وکړه چې روسیې په بخموت ښار کې د پرمختګونو ادعا کړې. دا ښار د دونیڅک سیمې د کنټرول ترلاسه کولو لپاره د تېرو څو میاشتو راهیسې د سختې جګړې مرکز دی.
سېرېسکي پر ټیلیګرام ویلي چې دښمن یې په نښه کړې او د ستراتیژیکې سیمو ساتلو ته یې دوام ورکړی دی. د روسیې دفاع وزارت د اپریل پر ۲۳مه وویل چې د بخموت په لوېدیځ کې یې دوه ضلعې نیولې دي.
اخوا په اوکراین کې د روسیې ملاتړ لرونکې واګنر اجیري ډلې مشر یېوګېني پریګوژین ویلي چې د بخموت نېږدې ټوله برخه يې تر کنټرول لاندې ده. دا راپورونه په خپلواکه توګه نه دې تایید شوي.
د دونیڅک د پوځ انتظامیې یوه چارواکي پاولو کېرېلینکو د اپریل پر ۲۴مه ویلي چې په بخموت کې په تېرو ۲۴ ساعتونو کې لږ تر لږه دوه ملکیان وژل شوي او دوه نور زخمیان شوي دي.
