د پاکستان په سيند صوبه کې په دوو بېلابېلو ټرافيکي پېښو کې ۱۸ کسان مړه شوي دي.
سرکاري خبري اژانس ليکلي چې د اپرېل پر ۲۴مه سېوڼ شريف ته پر لاره يو موټر له يو ټرالر سره ټکر شو چې له وجې یې ۱۳ کسان مړه او اووه زخميان شول. د سيند صوبې د کرنې وزیر جام خان شورو د پېښې ځای ته ورغلی وو او پر خپله ټويټر پاڼه یې ليکلي چې زخميان روغتون ته رسول شوي دي.
د هغه په وينا دغه کسان د لال شهباز قلندر زیارت ته روان ول چې ټکر یې وکړ.
بلخوا د پاکستان سرکاري راډيو په يو خبر کې ويلي چې د اپرېل پر ۲۴مه په يوه بله پېښه کې د سيند صوبې په جامشورو ضلع کې يو مساپر وړونکی بس له سړکه لوېدلی چې په نتيجه کې يې پينځه کسان مړه شوي دي.
