روسیې ویلي چې د هرې هغې هڅې هرکلی کوي چې د اوکراین شخړه پایی ته نېږدې کوي.
د کریملین ویاند دیمیتري پیسکوف د اپرېل پر ۲۷مه دا خبره تر هغه یوه ورځ روسته وکړه چې د اوکراین ولسمشر وولوديمیر زېلېنسکي او د چین ولسمشر شي جینپینګ د اوکراين له جګړې پيلېدو وروسته په لومړي ځل له يو بل سره پر ټېلېفون خبرې وکړې.
پیسکوف وویل، مسکو د دواړو مشرانو ترمینځ د شویو خبرو له جزیاتو خبر دی او د جګړې په اړه د دواړو مشرانو دریځونه هم هر چا ته معلوم دي.
هغه وویل، روسیه لا اړتیا لري چې هغو اهدافو ته ورسېږي چې د ترلاسه کولو لپاره یې هغوی په اوکراین کې "ځانګړي پوځي عملیات" پيل کړي دي.
روسیې د ۲۰۲۲ز کال د فبرورۍ پر ۲۴مه پر اوکراين بريد وکړ.
چین د جګړې په اوږدو کې ځان د یو بې طرفه منځګړي په توګه ساتلی، خو د روسیې د یرغل له غندلو څخه انکار او مسکو ته د ولسمشر شي جېنپينګ وروستی سفر د دې لامل شوی چې لویدیځ قدرتونه چین د روسیې په ملاتړ تورن کړي.
چین بیا وایي، په دې باور دی چې "د اوکراین د کړکېچ د هواري "یوازینۍ لاره" د سولې مذاکرات دي.
