د پاکستان د بهرنيو چارو وزير بلاول بوټو زرداري په هند کې د شانګهای همکارۍ سازمان غونډې ته په وينا کې د ترهګرۍ د ګواښ له منځه وړلو غوښتنه وکړه.
د پاکستان د بهرنیو چارو وزارت د مې پر پينځمه پر خپله رسمي ټوېټر پاڼه په بیان کې د بلاول بوټو زرداري په حواله لیکلي چې بايد د سفارتي مقاصدو حاصلولو لپاره ترهګري د وسلې په توګه و نه کارول شي.
بلاول بوټو زرداري د مې پر څلورمه د شانګهای همکارۍ سازمان د بهرنیو چارو وزیرانو په دوه ورځنۍ غونډه کې د ګډون لپاره د هند ګووا ښار ته ولاړ.
دا په تېرو ۱۲ کلونو کې هند ته د پاکستان د بهرنیو چارو وزیر لومړی سفر دی. د دواړو ګاونډیو هېوادونو تعلقات د ۲۰۱۹ز کال په فبرورۍ کې پر کنټرول کرښه د امنیتي ځواکونو تر نښتو او د هم هغه کال په اګست کې د نوي ډيلي له لوري د هند تر واک لاندې د جمو او کشمیر ځانګړي حیثیت ختمولو له کبله لا زیات خراب شول.
